హోమియోతో సొరియాసిస్ నుంచి విముక్తి

సొరియాసిస్ ఏ వయసులో వారికైనా వచ్చే అవకాశం ఉంది. మన చర్మం రెండు పొరలతో నిర్మితమై ఉంటుంది. బయటిపొరను ఎపిడెర్మిస్ అని, లోపలి పొరను డెర్మిస్ అని అంటారు. కణాలు డెర్మిస్ పొరలో పుట్టి ఎపిడెర్మిస్‌లోకి వస్తుంటాయి. ప్రతీ 28 నుంచి 30 రోజులకొకసారి ఎపిడెర్మిస్‌లోని కణాలు డెర్మిస్‌లో తయారయిన కొత్తకణాలతో రీప్లేస్ చేయబడతాయి. సొరియాసిస్ వ్యాధిలో కణాలు తయారయ్యే ప్రక్రియ వేగంగా జరుగుతుంది.

కొత్తకణాలు వేగంగా తయారయి చర్మంపై భాగానికి వచ్చేస్తుంటాయి. అధికంగా వచ్చేసిన ఆ కణాలు పేరుకుపోయి బిళ్లల మాదిరిగా తయారువుతుంది. సొరియాసిస్ అంటువ్యాధికాదు. ఒకరి నుంచి మరొకరికి వ్యాపించదు. సొరియాసిస్‌ను చర్మానికి సంబంధించిన వ్యాధిగా మాత్రమే పరిగణించి పైపూత మందుల ద్వారా తగ్గించే ప్రయత్నం చేస్తారు. ఈ మందుల ద్వారా అప్పటికప్పుడు ఉపశమనం కనిపించినా, తిరిగి అదే ప్రదేశంలో లేక వేరే ప్రాంతంలో మరింత తీవ్రస్థాయిలో వ్యాధి బయటపడుతుంది. సొరియాసిస్ ఎక్కువగా మోచేతులు, మెకాలు, తల, వీపు భాగాల్లో కనిపిస్తుంది. కాలిగోళ్లు, చేతిగోళ్లలోకి విస్తరిస్తుంది.

కారణాలు

ఆటో ఇమ్యూన్ కండీషన్ సొరియాసిస్‌కు కారణమవుతోంది. శరీరంలోని ఇమ్యూన్‌సెల్స్ పొరపాటున సొంత కణాలపై దాడిచేయడం వల్ల ఈ పరిస్థితి తలెత్తుతోంది. ఈ అబ్‌నార్మల్ రెస్పాన్స్ వల్ల అబ్‌నార్మల్‌గా కణాలు తయారవుతాయి. వంశపారంపర్యంగా ఈ సమస్య వచ్చే అవకాశం కూడా ఉంది. కుటుంబ సభ్యుల్లో ఎవరికైనా ఇలాంటి అటో ఇమ్యూన్ డిసీజెస్ ఉంటే వారి సంతానానికి సొరియాసిస్ వచ్చే అవకాశం ఉంటుంది. స్ట్రెప్టోకాకల్ ఇన్‌ఫెక్షన్, మానసిక ఒత్తిడి కూడా సొరియాసిస్‌కు కారణమవుతుంటాయి.

రకాలెన్నో...

సొరియాసిస్‌లో పలు రకాలున్నాయి. వ్యక్తికి వ్యక్తికి లక్షణాలు మారుతుంటాయి. సొరియాసిస్ విస్తరించిన ప్రదేశం, వ్యాధి ఉన్న కాలాన్నిబట్టి లక్షణాలుంటాయి.

ప్లేక్ సొరియాసిస్ : ప్లేక్ సొరియాసిస్ అతి సాధారణంగా వచ్చే వ్యాధి. 9 నుంచి 10 శాతం మంది రోగులు ప్లేక్ సొరియాసిస్‌తో బాధపడుతుంటారు. ఎర్రని ప్యాచ్‌ల మాదిరిగా ప్లేక్స్ చర్మంపై ఏర్పడతాయి. గోకినపుడు దురద, మంట ఉంటుంది. చర్మం పొడిబారినపుడు చర్మంపై పగుళ్లు ఏర్పడటంతో పాటు, రక్తస్రావం అవుతుంది. కీళ్లపై ప్రభావం పడినపుడు కీళ్ల దగ్గర వాపు, నొప్పి ఉంటుంది.

గట్టేట్ సొరియాసిస్ : గట్టేట్ సొరియాసిస్ పిల్లలతోపాటు యువతీ,యువకుల్లో ప్రారంభదశలో వచ్చే వ్యాధి. ఈ వ్యాధి వైరస్, బాక్టీరియాల వల్ల వచ్చి శ్వాసకోశ సమస్య ఏర్పడుతుంది. తల,చేతులు, కాళ్లపై ప్యాచ్‌లు ఏర్పడుతుంటాయి. ఇన్‌వర్స్ సొరియాసిస్ : చంకలు, ఛాతీ భాగంలో చర్మం మడతలుగా మారి ప్యాచ్‌లు ఏర్పడుతుంటాయి. ఈ వ్యాధికి చికిత్స చేయడం కష్టం.

సెబోరిక్ సొరియాసిస్ : ఎర్రని ప్యాచెస్‌లు చర్మంపై ఏర్పడతాయి. చెవులు, భుజం, ముఖంపై ఎర్రని మచ్చలు ఏర్పడతాయి.

నెయిల్ సొరియాసిస్ : చేతికున్న గోళ్లు పసుపు పచ్చగా మారతాయి. వేళ్లపై ఉన్న చర్మంపై పొక్కులు ఏర్పడుతుంటాయి.

పస్టులార్ సొరియాసిస్ : ప్యాచెస్‌లలో పస్ చేరి పగులుతుంటాయి. చేతులు, కాళ్లపై ఈ వ్యాధి కనిపిపిస్తుంటుంది.

సొరియాటిక్ ఆర్థరైటిస్: ఈ వ్యాధి మూలంగా జాయింటులు బిగుసుకుపోవడం, నొప్పి ఉంటుంది. సొరియాసిస్‌తో దీర్ఘకాలంగా బాధపడుతున్న వారిలో సొరియాటిక్ ఆర్థరైటిస్ వచ్చే అవకాశాలు ఎక్కువగా ఉంటాయి. సొరియాటిక్ ఆర్థరైటిస్‌తో బాధపడుతున్న వారిలో 80 శాతం మందిలో సొరియాసిస్ గోళ్లలో కనిపిస్తుంది. సిమ్మెట్రిక్ సొరియాటిక్ ఆర్థరైటిస్ ఉన్న వారిలో శరీరంలో రెండు వైపులా ఒకే ప్రదేశంలో లక్షణాలు కనిపిస్తాయి. మల్టిపుల్ జాయింట్స్‌పై ప్రభావం ఉంటుంది. రుమటాయిడ్ ఆర్థరైటిస్ మాదిరిగా ఉంటుంది. వెన్నులో ఉన్నప్పుడు నడుం బిగుసుకుపోవడం, మెడపై మంటగా ఉండటం వంటి లక్షణాలుంటాయి. సొరియాసిస్ వ్యాధి ప్రభావం శారీరకంగానే కాకుండా మానసికంగా తీవ్ర ప్రభావం చూపుతుంది.

జంబుష్ సొరియాసిస్ : ఎరిథ్రోడెర్మిక్, పస్టులార్ సోరియాస్ వ్యాధుల లక్షణాలు జంబుష్ సొరియాసిస్ వ్యాధిగ్రస్థుల్లో కనిపిస్తుంటాయి. ఈ వ్యాధి సోకిన రోగికి జ్వరం,మజిల్స్ బలహీనపడటం, బరువు కోల్పోవడం, ప్రొటీన్ లాస్ లాంటి లక్షణాలు కనిపిస్తాయి. ఈ వ్యాధి పెద్దవారిలో వస్తే ప్రమాదం పొంచి ఉంటుంది.

హోమియో చికిత్స

సొరియాసిస్‌కు హోమియో వైద్య విధానంలో చక్కని చికిత్స అందుబాటులో ఉంది. రోగనిరోధక శక్తిని పెంపొందించి, గ్రంథులను ఉత్తేజపరిచి, వ్యాధి కారకములను తగ్గించే విధంగా చికిత్స అందించడం ద్వారా సొరియాసిస్‌ను సమూలంగా తగ్గించవచ్చు. ఈ చికిత్సకణజాల స్థాయిలో పనిచేసి వ్యాధి నిరోధక శక్తిని సాధారణ స్థాయికి తీసుకుస్తుంది. గ్రాఫైటిస్, నేట్రంమూర్, లైకోపోడియం, సల్ఫర్, సెపియా, స్టెపిసాగరియా, బరేటా కర్బ్, ప్రాస్పరస్,పల్సటిల్లా వంటి మందులు సొరియాసిస్ చికిత్సలో బాగా ఉపయోగపడతాయి. వీటివల్ల ఎలాంటి దుష్ప్రభావాలు ఉండవు. వ్యాధి తీవ్రతను బట్టి చికిత్సా కాలం ఉంటుంది. నిపుణులైన హోమియో వైద్యున్ని సంప్రదించి చికిత్స తీసుకుంటే వ్యాధి పూర్తిగా తగ్గిపోవడానికి ఆస్కారం ఉంటుంది.